1. 1. Qovoq tepasidagi yoysimon tukli qatlam. Quyuq qosh. Payvasta qosh. Qosh(ni) bo‘yamoq. Qosh(ni) termoq. Qosh(ni) chimirmoq. Qosh(ni) qoqmoq. ▬ Samandarov bir qoshi past va bir qoshi baland bo‘lib, o‘chib qolgan maxorkasini chiroqdan tutatib oldi. A. Qahhor, Qo‘shchinor chiroqlari
— Hoy-hoy, — kotib tutash qoshlarini uchirib qo‘yib, Akbarga ko‘z qisdi. A. Obidjon, Akang qarag‘ay Gulmat

2. 2. Ba’zi narsalarning old qismi, turtib chiqqan joyi. Ayvonning qoshi. ▬ Xizmatkorlar qo‘ltig‘imdan ko‘tarib, otga mingashtirmoqchi bo‘lganlarida, oyog‘im uzangidan toyib, burnim egarning qoshiga tegib ketdi. G‘. G‘ulom, Tirilgan murda

3. 3. Uzuk, isirg‘a kabi buyumlarga o‘yib solingan yoysimon gul — bezak. Kanizlarning qo‘llarida qoshlari brilliant oltin bilaguzuklar, bo‘yinlarida zebigardonlar. J. Sharipov, Xorazm

4. ko‘m. vzf. zf. (3-shaxs egalik va makon kelishiklari shaklida — qoshiga, qoshida, qoshidan) Makon munosabatlarini bildiradi. Hech kim rahm aylamas qolish yoshimga, Shakar aka, kelgin mening qoshimga. Shirin bilan Shakar
Qoshimdan noz-istig‘no bilan ketding, yomon bo‘ldi, Qoshimga noz-istig‘no bilan kelsang, yomon bo‘lmas. J. Kamol
Uch qizim bor, bir o‘g‘lim bor qoshimda, Baxt-u davlat keldi yetmish yoshimda. Habibiy